係唔係淨係型同過癮就得？

(實在沒有時間寫新作品，暫時先轉貼舊文頂住先）

寫於2006年10月31日

近日上畫兩部大師電影：《The Departed無間道風雲》(2006)同《放．逐》(2006)，我有唔少朋友（非影迷類，即係一年睇十幾部戲，又唔會去影展果類）睇完都話悶、唔好睇．幾個朋友不約而同都話唔夠型！佢地都話鍾意《無間道》(2002)多過《The Departed》，同埋鍾意《槍火》(1999)多過《放逐》．理由都係：唔夠型仔同唔夠過癮！

我覺得而家D人睇戲都好要求型仔就算，話之你故事有幾不濟同冇深度．係唔係真係單單一個「型」字就夠？係唔係唔搞小小笑你就睇得唔過癮？

要比較《The Departed》同《無間道》，可唔可以客觀D？係唔係唔夠型就可以話《The Departed》差過《無間道》？我個人覺得《無間道》係一套成功嘅電影，特別係劉偉強嘅攝影同音樂配搭真係幾得，好多幕都好有震撼力（最佳例子就係黃sir死果一幕）。同時，節奏明快亦令人睇得過癮．傻強嘅出現就更係經典啦！《The Departed》冇錯係慢小小，同埋又冇咁有型（起碼唔會套套老西model行catwalk咁），但係咁樣係唔係就可以話《The Departed》比《無間道》差？Hard sell蔡琴就係好？冇一個pan shot影天台一幕就唔緊張？兩個男主角出咗戲院，在Chinatown追逐就唔好反而在數碼港攞景就正？Jack Nicholson講咁多野就係廢話而曾志偉好「型」咁祝咁多位阿sir一帆風順就過癮？又或者，死咗人之後整段女高音就好過鴉雀無聲？

馬田史高西斯不嬲出名唔係型，而係有實感．個人而言，《The Departed》就有實感好多。正如家明所講，天台得兩個人，伸到隻手咁直把鬼咩？可能睇《The Departed》時我刻意唔去諗《無間道》，加上套戲開頭又唔係咁似《無間道》，所以頭半段我其實睇得幾過癮，因為幾史高西斯（但係後半段因為實在太似原作，所以扣分，不過呢個係後話）。《The Departed》入面其實Jack Nicholson同Dicarprio幾段對話其實拍得好好，真係字字珠璣，句句有骨。當中兩個人嘅智慧角力令人看得手心出汗．難道咁樣就唔緊張？

我睇完《The Departed》之後，反而覺得《無間道》太造作。不過咁，佢始終都係一套成功嘅作品．我亦無意將《The Departed》抬高去踩《無間道》。我只不過係睇唔過眼咁多人話後者好睇過前者好多。《The Departed》亦有佢不濟嘅地方，好似Mark Wahlberg個角色設計就好失敗，此外用SMS就真係好唔合情理等等。



另外，好多人鍾意《槍火》，就係因為佢夠型，又話D槍戰幾經典，成套戲唔夠一百句對白幾型云云。（其實又有幾多人係喺戲院睇吖？據知票房其實幾慘淡．好多人都係後尾睇番碟，再俾人講多幾講咪個個話好囉！）但係同《放逐》一比之下，好明顯故事同人物刻劃就唔夠。又係一味播住首歌，一班人好型咁行就正。呀，仲有，《槍火》有一幕都幾「經典」嘅，就係踢紙仔。其實我覺得除咗特登搞笑之外，唔覺得有乜咁特別。

論講情義，《槍火》都真係冇《放．逐》一半。果種豪邁嘅意景，《槍火》亦欠奉。《槍火》有嘅只係一個好簡單嘅故事，但係其實寫情幾乎係零。

其實我覺得，以導技而言，《The Departed》同《放．逐》一定比《無間道》同《槍火》好。以深度而言亦係。可惜，偏偏就係好多人覺得首兩套不及後兩套。仲衰，有唔少人話睇《The Departed》同《放．逐》悶到想離場！

再重新一次，我無意去眨低《無間道》同《槍火》。我只係唔忿氣咁多人將呢兩套片抬得太高而忽略咗《The Departed》同《放．逐》的可觀性。

當然，好多懶有型嘅戲係唔收得，尤其是抄襲《無間道》果D三流港產片．不過呢個亦係題外話。